ಕೊರೋನಾ ಅಟ್ಟಹಾಸ: ಭೂತಾನ್​ನಲ್ಲಿ ಮೊದಲ ಪ್ರಕರಣ ಪತ್ತೆ; ಅಮೆರಿಕದಲ್ಲಿ 12ಕ್ಕೇರಿದ ಸಾವಿನ ಸಂಖ್ಯೆ

ನವದೆಹಲಿ(ಮಾ. 06): ವಿಶ್ವವನ್ನೇ ಬೆಚ್ಚಿಬೀಳಿಸುತ್ತಿರುವ ಕರೋನಾ ವೈರಸ್​​ ಪ್ರಕರಣಗಳು ದಿನೇ ದಿನೇ ಹೆಚ್ಚುತ್ತಲೇ ಇದೆ. ಜಗತ್ತಿನ ಹಲವು ರಾಷ್ಟ್ರಗಳು ಈ ಸೋಂಕಿನಿಂದ ಕಂಗಲಾಗುತ್ತಿದ್ದು, ಇದಕ್ಕೆ ಹೊಸ ಸೇರ್ಪಡೆ ಭೂತಾನ್​​ ಆಗಿದೆ.

ಪುಟ್ಟ ರಾಷ್ಟ್ರವಾಗಿರುವ ಭೂತಾನ್​​ನಲ್ಲಿ ಮೊದಲ ಕರೋನಾ ವೈರಸ್​ ಪ್ರಕರಣ ಪತ್ತೆಯಾಗಿದೆ. ಪ್ರವಾಸಿಗರ ಆಕರ್ಷಣ ತಾಣವಾಗಿರುವ ಭೂತಾನ್​ನಲ್ಲಿ ಅಮೆರಿಕದ ಪ್ರವಾಸಿಗರೊಬ್ಬರು ಈ ಸೋಂಕಿಗೆ ತುತ್ತಾಗಿರುವುದು ವೈದ್ಯಕೀಯ ತಪಾಸಣೆಯಲ್ಲಿ ದೃಢಪಟ್ಟಿದೆ.

ಸೋಂಕು ತಗುಲಿರುವ 76 ವರ್ಷದ ಅಮೆರಿಕನ್ ಪ್ರವಾಸಿಗ ಮಾರ್ಚ್​ 2ರಂದು ಭಾರತದಿಂದ ಭೂತಾನ್​ಗೆ ಪ್ರವಾಸ ಬೆಳಸಿದ್ದರು. ತೀವ್ರ ಜ್ವರದಿಂದ ಬಳಲುತ್ತಿದ್ದ ಅವರನ್ನು ಪರೀಕ್ಷಿಸಿದಾಗ ಕೋವಿಡ್​-19 ಸೋಂಕಿರುವುದು ಪತ್ತೆಯಾಗಿದೆ.

ಈ ಹಿನ್ನೆಲೆಯಲ್ಲಿ ದೇಶಕ್ಕೆ ಪ್ರವಾಸ ಬರುವವರಿಗೆ ಎರಡು ವಾರಗಳ ನಿರ್ಬಂಧ ವಿಧಿಸಲಾಗಿದೆ. ರಾಜಧಾನಿ ತಿಂಪುವಿನ ಮೂರು ಪ್ರದೇಶಗಳಲ್ಲಿ ಶಾಲೆಗಳನ್ನು ಎರಡು ವಾರಗಳ ಮಟ್ಟಿಗೆ ಮುಚ್ಚಲಾಗಿದೆ ಎಂದು ಇಲ್ಲಿನ ಪ್ರಧಾನಿ ತಿಳಿಸಿದ್ದಾರೆ.

ಇನ್ನು ಅಮೆರಿಕದಲ್ಲಿ ಕೊರೋನಾ ವೈರಸ್​ನಿಂದಾಗಿ ಸಾವಿನ ಸಂಖ್ಯೆ 12ಕ್ಕೆ ಏರಿದೆ. ಇದುವರೆಗೆ ಅಲ್ಲಿ 57 ಪ್ರಕರಣಗಳು ದೃಢಪಟ್ಟಿದೆ.

ಇದನ್ನು ಓದಿ: ಕೊರೋನಾ ವೈರಸ್: ಭಾರತದಲ್ಲಿ ಸೋಂಕಿತರ ಸಂಖ್ಯೆ 30ಕ್ಕೇರಿಕೆ; ವಿಶ್ವಾದ್ಯಂತ ಕ್ಷಿಪ್ರ ವೇಗದಲ್ಲಿ ಸೋಂಕು ಏರಿಕೆ

ಚೀನಾದ ವೂಹಾನ್​ನಲ್ಲಿ ಮತ್ತೆ ಹೊಸದಾಗಿ 126 ಪ್ರಕರಣಗಳು ದೃಢಪಟ್ಟಿದೆ. ದಕ್ಷಿಣ ಕೋರಿಯದಲ್ಲಿ ಕೂಡ ಹೊಸದಾಗಿ 196 ಪ್ರಕರಣ ದಾಖಲಾಗಿದ್ದು, ಏಳು ಜನರು ಸಾವನ್ನಪ್ಪಿದ್ದಾರೆ.