ನೀರು ಫ್ರೀ, ಊಟಕ್ಕೆ ದುಡ್ಡು: ಸರ್ಕಾರದ ನೀತಿಯಲ್ಲಿ ಒಂದಷ್ಟು ಮಾರ್ಪಾಡು?

ಬೆಂಗಳೂರು(ಏ. 03): ಕೊರೋನಾ ನಿಗ್ರಹ ದೃಷ್ಟಿಯಿಂದ 21 ದಿನಗಳ ಲಾಕ್ ಡೌನ್ ಹೇರಿರುವುದು ಜನಜೀವನಕ್ಕೆ ಬಹಳ ಸಂಕಷ್ಟ ತಂದಿದೆ. ವಿವಿಧ ರೀತಿಯಲ್ಲಿ ಜನರು ಎದರಿಸುತ್ತಿರುವ ಸಮಸ್ಯೆಗಳ ಹೊರೆಯನ್ನ ಸ್ವಲ್ಪವಾದರೂ ತಗ್ಗಿಸಲು ಸರ್ಕಾರ ಕೆಲ ಕ್ರಮಗಳನ್ನ ಕೈಗೊಳ್ಳಲು ನಿರ್ಧರಿಸಿದೆ. ಅದರಂತೆ, ನಗರಾದ್ಯಂತ ಆರ್​ಒ ನೀರಿನ ಘಟಕಗಳಲ್ಲಿ ಉಚಿತವಾಗಿ ಕುಡಿಯುವ ನೀರನ್ನು ವಿತರಿಸಲಿದೆ. ಬಿಬಿಎಂಪಿ ಮೇಯರ್ ಗೌತಮ್ ಕುಮಾರ್ ಜೈನ್ ಶೀಘ್ರದಲ್ಲೇ ಇದನ್ನು ಪ್ರಕಟಿಸಲಿದ್ದಾರೆ.

ಬೆಂಗಳಳೂರಿನ 198 ವಾರ್ಡ್​ಗಳಲ್ಲಿ 500ಕ್ಕೂ ಹೆಚ್ಚು ಆರ್​ಒ ಪ್ಲಾಂಟ್​ಗಳಿವೆ. ಇಲ್ಲಿ 20 ಲೀಟರ್ ಕ್ಯಾನ್​ನಷ್ಟು ನೀರಿಗೆ 5 ರೂಪಾಯಿ ದರ ಇದೆ. ಈಗ ಕೊರೋನಾ ಸಂಕಷ್ಟ ಬಗೆಹರಿಯುವವರೆಗೂ ಉಚಿತವಾಗಿ ನೀರನ್ನು ನೀಡುವ ಸಾಧ್ಯತೆ ಇದೆ. ಬಿಬಿಎಂಪಿಯ ಸಭೆಯಲ್ಲಿ ಈ ವಿಚಾರದ ಬಗ್ಗೆ ಚರ್ಚೆಯಾಗಿ ಎಲ್ಲರೂ ಸಕಾರಾತ್ಮಕವಾಗಿ ಸ್ಪಂದಿಸಿದ್ದಾರೆನ್ನಲಾಗಿದೆ.

ಇದನ್ನೂ ಓದಿ: ಪ್ರಧಾನಿ ಹೇಳಿದಂತೆ ದೀಪ ಹಚ್ಚಲು ಮೇಣದಬತ್ತಿ ಎಲ್ಲಿಂದ ತರೋಣ, ಹೊರಗೆ ಹೋದರೆ ಗೂಸಾ ಬೀಳ್ತಾವೆ; ಎಚ್​ಡಿ ರೇವಣ್ಣ

ಇದೇ ವೇಳೆ, ಇಂದಿರಾ ಕ್ಯಾಂಟೀನ್​ಗಳಲ್ಲಿ ಆಹಾರ ಪ್ಯಾಕೆಟ್​ಗಳನ್ನ ಉಚಿತವಾಗಿ ವಿತರಿಸುವ ಯೋಜನೆ ಸ್ಥಗಿತಗೊಳ್ಳುವ ಸಾಧ್ಯತೆ ಇದೆ. ಮೊದಲು ಇದ್ದ 5 ಮತ್ತು 10 ರೂ ದರ ನಿಗದಿಪಡಿಸುವಂತೆ ಮುಖ್ಯಮಂತ್ರಿ ಯಡಿಯೂರಪ್ಪ ಅವರು ಸಂಪುಟ ಸಭೆಯಲ್ಲಿ ಸೂಚಿಸಿದ್ದಾರೆನ್ನಲಾಗಿದೆ.