ಕೊರೋನಾ ಸೋಂಕಿತರಿಗೆ ಹಣ ವಾಪಸ್ ನೀಡಿದ ಬೆಂಗಳೂರಿನ ಖಾಸಗಿ ಆಸ್ಪತ್ರೆ

ಬೆಂಗಳೂರು: ಕೋವಿಡ್ ರೋಗಿಗಳಿಂದ ಸರ್ಕಾರ ನಿಗದಿಪಡಿಸಿದಕ್ಕಿಂತ ಅಧಿಕ ಹಣ ವಸೂಲಿ ಮಾಡಿದ ಕೆಲ ಖಾಸಗಿ ಆಸ್ಪತ್ರೆಗಳು ಮತ್ತೆ ರೋಗಿಗಳಿಗೆ ಹಣ ವಾಪಸ್ ಮಾಡಿವೆ. ಸರ್ಕಾರಿ ನಿಯಮಗಳನ್ನ ಗಾಳಿಗೆ ತೂರಿ ಕೆಲವು ಖಾಸಗಿ ಆಸ್ಪತ್ರೆಗಳು ಕೊವೀಡ್ ರೋಗಿಗಳ ಬಳಿ ಲಕ್ಷಾಂತರ ಹಣ ವಸೂಲಿ ಮಾಡಿದ್ದವು. ಖಾಸಗಿ ಆಸ್ಪತ್ರೆಗಳ ಈ ಬಿಲ್ ದಾಹವನ್ನ ಗಂಭೀರವಾಗಿ ಪರಿಗಣಿಸಿದ ಸರ್ಕಾರ, ಆಸ್ಪತ್ರೆಗಳ ಮೇಲೆ ನಿಗಾ ವಹಿಸಲು ಐಎಎಸ್‌ ಮತ್ತು ಐಪಿಎಸ್ ಅಧಿಕಾರಿಗಳ ನೇತೃತ್ವದಲ್ಲಿ ವಿಶೇಷ ತಂಡ ರಚನೆ ಮಾಡಿತ್ತು.

ಸರ್ಕಾರದ ಆದೇಶದಂತೆ ಬಿಬಿಎಂಪಿ ವಲಯವಾರು ಅಸ್ಪತ್ರೆಗಳ ಮೇಲೆ ಅಧಿಕಾರಿಗಳು ದಾಳಿ ನಡೆಸಿ ಪರಿಶೀಲಿಸಿದಾಗ,  ಹಲವು ಆಸ್ಪತ್ರೆಗಳು ಮುಂಗಡ ಮತ್ತು ಬಿಲ್ ನೆಪದಲ್ಲಿ ಲಕ್ಷಗಟ್ಟಲೇ ಹಣ ಪಡೆದಿರುವುದು ಬೆಳಕಿಗೆ ಬಂದಿತ್ತು. ನಗರದ ರಾಜರಾಜೇಶ್ವರಿನಗರದ ಖಾಸಗಿ ಆಸ್ಪತ್ರೆಯೊಂದರಲ್ಲಿ ಕೊರೋನಾ ಸೋಂಕಿತರಿಂದ ಲಕ್ಷಗಟ್ಟಲೇ ಹಣ ಪಡೆದಿರುವುದು ಪತ್ತೆಯಾಗಿತ್ತು.

ರೈತರು, ಕಾರ್ಮಿಕರ‌ ವಿರೋಧಿ ಕಾನೂನುಗಳಿಗೆ ಎಐಟಿಯುಸಿ ಖಂಡನೆ; ಸೆಸ್ ವಿರೋಧಿಸಿ ಎಪಿಎಮ್‌ಸಿ ವರ್ತಕರ ಮುಷ್ಕರ

ಖಾಸಗಿ ಆಸ್ಪತ್ರೆ ಮೇಲೆ ಐಎಎಸ್‌ ಅಧಿಕಾರಿ ಹರ್ಷಗುಪ್ತ ಮತ್ತು ಐಜಿಪಿ ಡಿ. ರೂಪಾ ನೇತೃತ್ವದ ತಂಡ ದಾಳಿ ನಡೆಸಿ ಆಸ್ಪತ್ರೆಗೆ ದಾಖಲಾದ ಸೋಂಕಿತರ ಸಂಖ್ಯೆ, ಅದರಲ್ಲಿ ಸರ್ಕಾರದ ವ್ಯಾಪ್ತಿಗೆ ನೀಡಿರುವ ಬೆಡ್ ಗಳ ಸಂಖ್ಯೆ ಹಾಗೂ ರೋಗಿಗಳ ಬಳಿ ಪಡೆಯುತ್ತಿರುವ ಬಿಲ್ ಮೊತ್ತ ಪರಿಶೀಲನೆ ನಡೆಸಿದ್ದರು.

ಅಧಿಕಾರಿಗಳ ಪರಿಶೀಲನೆ ವೇಳೆ ಸರ್ಕಾರ ನಿಗದಿಸಿದ ಹಣಕ್ಕಿಂತ ದುಪ್ಪಟ್ಟು ವಸೂಲಿ ಮಾಡಿರುವುದು ಬೆಳಕಿಗೆ ಬಂದಿತ್ತು. ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದಿದ್ದ 22 ಸೋಂಕಿತರಿಂದ ಲಕ್ಷ ಲಕ್ಷ ಹಣ ವಸೂಲಿ ಮಾಡಿರುವ ಬಗ್ಗೆ ಐಪಿಎಸ್ ಅಧಿಕಾರಿ ಡಿ. ರೂಪಾ ಮತ್ತು ಐಎಎಸ್‌ ಅಧಿಕಾರಿ ಹರ್ಷಗುಪ್ತ ಬಯಲಿಗೆ ತಂದಿದ್ದರು.

ಬಳಿಕ ಎರಡು ದಿನದಲ್ಲಿ ಸೋಂಕಿತರಿಗೆ ಹಣ ವಾಪಸ್ ನೀಡುವಂತೆ ವಿಶೇಷ ತಂಡ ತಾಕೀತು ಮಾಡಿತ್ತು. ಅಧಿಕಾರಿಗಳ ಎಚ್ಚರಿಕೆ ಬಳಿಕ ಅಸ್ಪತ್ರೆ ಆಡಳಿತ ಮಂಡಳಿ 22 ಸೋಂಕಿತರಿಗೆ 24 ಲಕ್ಷ ಹಣವನ್ನ ರಿಫಂಡ್ ಮಾಡಿದೆ. ಖಾಸಗಿ ಆಸ್ಪತ್ರೆ ಹಣ ರಿಫಂಡ್ ಮಾಡಿದ್ದ ಬಗ್ಗೆ ಐಜಿಪಿ ಡಿ. ರೂಪಾ ತಮ್ಮ ಟ್ವಿಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.