ಬೆಂಗಳೂರಿನ ಆರೋಗ್ಯಾಧಿಕಾರಿಗಳ ಎಡವಟ್ಟು; ಕಾನ್ಸ್​ಟೇಬಲ್ ಮನೆಮಂದಿಗೆಲ್ಲ ಕೊರೋನಾ ಭೀತಿ

ಬೆಂಗಳೂರು (ಜು. 8): ರಾಜ್ಯದಲ್ಲಿ ಕೊರೋನಾ ಆತಂಕ ಯಾರನ್ನೂ ಬಿಟ್ಟಿಲ್ಲ. ಜನರ ಸುರಕ್ಷತೆಗಾಗಿ ಕಾರ್ಯ ನಿರ್ವಹಿಸುತ್ತಿರುವ ಪೊಲೀಸ್ ಇಲಾಖೆಯಲ್ಲೂ ಕೊರೋನಾ ಆತಂಕ ಹೆಚ್ಚಾಗಿದೆ.  ಈಗಾಗಲೇ ರಾಜ್ಯಾದ್ಯಂತ ಎಲ್ಲ ಪೊಲೀಸರಿಗೂ ಕೊರೋನಾ ತಪಾಸಣೆ ಮಾಡಲಾಗುತ್ತಿದೆ. ಇದರ ನಡುವೆ ಬೆಂಗಳೂರಿನ ಆರೋಗ್ಯ ಇಲಾಖೆ ಅಧಿಕಾರಿಗಳು ಮತ್ತೊಂದು ಎಡವಟ್ಟು ಮಾಡಿದ್ದಾರೆ. ಆ ಒಂದು ಎಡವಟ್ಟಿನಿಂದ ಮನೆ ಮಂದಿಗೆಲ್ಲಾ ಈಗ ಕೊರೋನಾ ಸೋಂಕಿನ ಭಯ ಶುರುವಾಗಿದೆ.

ಬೆಂಗಳೂರಿನ  ಚಾಮರಾಜಪೇಟೆ ಕಾನ್ಸ್‌ಟೇಬಲ್​ಗೆ ಜೂನ್ 26 ರಂದು  ಕೊರೋನಾ ಪಾಸಿಟಿವ್ ಬಂದಿತ್ತು. ಕೂಡಲೇ ಸೋಂಕಿತ ಪೊಲೀಸ್ ಕಾನ್ಸ್‌ಟೇಬಲ್  ಅವರನ್ನು ರವಿಶಂಕರ್ ಗುರೂಜಿ ಕೋವಿಡ್ ಕೇರ್ ಸೆಂಟರ್ ನಲ್ಲಿ ದಾಖಲು ಮಾಡಲಾಗಿತ್ತು. ಅಲ್ಲಿಯೇ ಚಿಕಿತ್ಸೆ ಸಹ ನೀಡಲಾಗಿತ್ತು. ಇದಾದ ಬಳಿಕ ಜುಲೈ 3ರಂದು ಕೋವಿಡ್ ಕೇರ್ ಸೆಂಟರ್ ಪೊಲೀಸ್ ಪೇದೆಯನ್ನು ಬಿಡುಗಡೆ ಸಹ ಮಾಡಲಾಗಿತ್ತು.‌ ಆದರೆ, ಇಲ್ಲಿ ಆರೋಗ್ಯ ಅಧಿಕಾರಿಗಳು ಆತನನ್ನು ಮನೆಗೆ ಕಳಿಸುವ ಮುನ್ನ ಕೊರೋನಾ ತಪಾಸಣೆ ಸಹ ಮಾಡಿಲ್ಲ. ಬದಲಾಗಿ ನಿಮಗೆ ಯಾವುದೇ ಸೋಂಕಿನ ಲಕ್ಷಣಗಳಿಲ್ಲ, ಆರಾಮಾಗಿ ಮನೆಗೆ ಹೋಗಿ ಎಂದು ಹೇಳಿ ಕಳುಹಿಸಿದ್ದಾರೆ.

ಹೀಗೆ ಮನೆಗೆ ಬಂದ ಪೊಲೀಸ್ ಕಾನ್ಸ್​ಟೇಬಲ್​ಗೆ ಕರ್ತವ್ಯಕ್ಕೆ ಆಗಮಿಸುವ ಮೊದಲು ಮತ್ತೊಂದು ಟೆಸ್ಟ್ ಮಾಡಿಸಲಾಗಿದೆ. ಜುಲೈ 4ರಂದು ಮತ್ತೊಂದು ಟೆಸ್ಟ್ ಮಾಡಿಸಲಾಗಿದ್ದು ಅದರ ವರದಿಯಲ್ಲಿ ಪೊಲೀಸ್ ಪೇದೆಗೆ ಪಾಸಿಟಿವ್ ಅಂತ ಬಂದಿದೆ. ಬೆಂಗಳೂರಿನ ಪೊಲೀಸ್ ಕಾನ್ಸ್​ಟೇಬಲ್​ಗೆ ಕೊರೋನಾ ಸೋಂಕು ಸಂಪೂರ್ಣವಾಗಿ ವಾಸಿಯಾಗುವ ಮೊದಲೇ ಆಸ್ಪತ್ರೆಯಿಂದ ಮನೆಗೆ ಕಳುಹಿಸಲಾಗಿತ್ತು. ಇದರಿಂದಾಗಿ ಅವರ ಹೆಂಡತಿ, ಮಗು ಸೇರಿ ಕುಟುಂಬದ 7 ಜನರಿಗೆ ಕೊರೋನಾ ಭಯ ಶುರುವಾಗಿದೆ.  ಕಾನ್ಸ್‌ಟೇಬಲ್ ತಂದೆ  ಕೂಡ ಜ್ವರದಿಂದ ಬಳಲುತಿದ್ದಾರೆ.‌ ಸದ್ಯ ಮನೆಯ ಏಳು ಜನರು ಕೋವಿಡ್ ಟೆಸ್ಟ್​ಗೆ ಒಳಗಾಗಿದ್ದು, ವರದಿಗಾಗಿ ಕಾಯುತ್ತಿದ್ದಾರೆ. ಸೋಂಕಿತ ಕಾನ್ಸ್‌ಟೇಬಲ್​ನನ್ನು ಮತ್ತೆ ಕೋವಿಡ್ ಕೇರ್ ಸೆಂಟರ್ ಗೆ ದಾಖಲು ಮಾಡಲಾಗಿದೆ.