ಮೋದಿಯನ್ನು ಟೀಕಿಸಿದವರ ಬಂಧನ; ನನ್ನನ್ನೂ ಅರೆಸ್ಟ್ ಮಾಡಿ ಎಂದು ಸವಾಲೆಸೆದ ರಾಹುಲ್ ಗಾಂಧಿ!

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಸರ್ಕಾರದ ಲಸಿಕೆ ನೀತಿಯನ್ನು ಟೀಕಿಸಿದ 25ಕ್ಕೂ ಹೆಚ್ಚು ಮಂದಿಯನ್ನು ದೆಹಲಿ ಪೊಲೀಸರು ಬಂಧಿಸಿದ್ದಾರೆ. ನಮ್ಮ ಮಕ್ಕಳಿಗೆ ಸೇರಬೇಕಿದ್ದ ಲಸಿಕೆಯನ್ನು ವಿದೇಶಕ್ಕೆ ಏಕೆ ಕಳುಹಿಸಿದಿರಿ ಎಂದು ಪಿಎಂ ಮೋದಿಯವರನ್ನು ಪ್ರಶ್ನಿಸುವ ಪೋಸ್ಟ್​​ ನಿನ್ನೆಯಿಂದ ಸಾಮಾಜಿಕ ಜಾಲತಾಣಗಳನ್ನು ವೈರಲ್​ ಆಗಿದೆ. ಈ ಪೋಸ್ಟನ್ನು ಶೇರ್​ ಮಾಡಿದವರನ್ನು ದೆಹಲಿ ಪೊಲೀಸರು ಬಂಧಿಸಿ ಎಫ್​ಐಆರ್​ ದಾಖಲಿಸಿರುವ ಆರೋಪ ಕೇಳಿ ಬಂದಿದೆ. ಈ ಹಿನ್ನೆಲೆಯಲ್ಲಿ ಕಾಂಗ್ರೆಸ್​ ನಾಯಕ ರಾಹುಲ್​ ಗಾಂಧಿ ಸಹ ತಮ್ಮ ಟ್ವಿಟರ್​ ಖಾತೆಯನ್ನು ವಿವಾದಿತ ಪೋಸ್ಟನ್ನು​​ ಅಪಲೋಡ್​ ಮಾಡಿ ನನ್ನನ್ನೂ ಬಂಧಿಸಿ ಎಂದು ಬರೆದುಕೊಂಡಿದ್ದಾರೆ.

ಪ್ರಧಾನಿ ಮೋದಿಯನ್ನು ಟೀಕಿಸಿದವರೆಲ್ಲರನ್ನೂ ಬಂಧಿಸುವುದಾದರೆ ನನ್ನನ್ನು ಬಂಧಿಸಿ ಎಂದು ರಾಹುಲ್​ ಗಾಂಧಿ ಸವಾಲೆಸೆದಿದ್ದಾರೆ. ಆಮ್​ ಆದ್ಮಿ ಪಕ್ಷ ಕೂಡ ತನ್ನ ಅಧಿಕೃತ ಖಾತೆಯಲ್ಲಿ ವಿದೇಶಕ್ಕೆ ಏಕೆ ಲಸಿಕೆ ನೀಡಿದಿರಿ ಎಂಬ ಬರಹವನ್ನು ಪೋಸ್ಟ್​ ಮಾಡಿದೆ. ಭಾರತದಲ್ಲಿ ಕೊರೋನಾ ಲಸಿಕೆಯ ಕೊರತೆ ಗಂಭೀರ ಸ್ವರೂಪ ಪಡೆದುಕೊಂಡಿದೆ. ನಮಗೆ ಸೇರಬೇಕಿದ್ದ ಲಸಿಕೆಯನ್ನು ವಿದೇಶಗಳಿಗೆ ಪ್ರಧಾನಿ ಮೋದಿ ದಾನ ಮಾಡಿದ್ದಾರೆ. ಏಕೆ ಈ ರೀತಿ ದಾನ ಮಾಡಬೇಕಿತ್ತು ಎಂಬ ಬರಹ ನಿನ್ನೆಯಿಂದ ಭಾರೀ ಸಂಚಲನ ಸೃಷ್ಟಿಸಿದೆ.

Arrest me too.

मुझे भी गिरफ़्तार करो। pic.twitter.com/eZWp2NYysZ

— Rahul Gandhi (@RahulGandhi) May 16, 2021

ಈ ಬರಹವನ್ನು ಶೇರ್​ ಮಾಡಿದವರನ್ನು ಬಂಧಿಸುತ್ತಿದಂತೆ ವಿಷಯ ರಾಜಕೀಯ ಜಟಾಪಟಿಗೆ ಎಡೆ ಮಾಡಿದೆ. ಇನ್ನು ದೆಹಲಿ ಪೊಲೀಸರು 25ಕ್ಕೂ ಹೆಚ್ಚು ಜನರ ಮೇಲೆ ಪೀನಲ್​ ಕೋಡ್​ 188ರ ಅಡಿಯಲ್ಲಿ ಪ್ರಕರಣ ದಾಖಲಿಸಿರುವುದು ಆಕ್ರೋಶಕ್ಕೆ ಕಾರಣವಾಗಿದೆ. ಪ್ರಧಾನಿ ಮೋದಿ ಅವರ ಲಸಿಕೆ ನೀತಿಯನ್ನು ಟೀಕಿಸುವುದು ಹೇಗೆ ಅಪರಾಧವಾಗುತ್ತೆ ಎಂದು ಕಿಡಿಕಾರುತ್ತಿದ್ದಾರೆ.

ಕೇಂದ್ರದ ಮಾಜಿ ಸಚಿವ ಜೈರಾಮ್​ ರಮೇಶ್​ ಸಹ ದೆಹಲಿ ಪೊಲೀಸರ ನಡೆ ವಿರುದ್ಧ ಅಸಮಾಧಾನ ಹೊರ ಹಾಕಿದ್ದಾರೆ. ಮೋದಿಯನ್ನು ಟೀಕಿಸುವುದು ಈಗ ಅಪರಾಧವಾಯಿಯೇ? ಹಾಗಾದರೆ ನನ್ನನ್ನು ಬಂಧಿಸಿ ನೋಡೋಣ ಎಂದು ದೆಹಲಿ ಪೊಲೀಸರಿಗೆ ಸವಾಲು ಹಾಕಿದ್ದಾರೆ. ಸಾಮಾಜಿಕ ಜಾಲತಾಣಗಳನ್ನು ಈ ಬಗ್ಗೆ ಭಾರೀ ಪರ-ವಿರೋಧ ವ್ಯಕ್ತವಾಗುತ್ತಿದೆ.