ಅರ್ಜೆಂಟೀನಾ ವಿಜ್ಞಾನಿಗಳಿಂದ ಬಹಳ ಅಗ್ಗ ಮತ್ತು ವೇಗದ ಕೊರೋನಾ ಪರೀಕ್ಷಾ ಕಿಟ್ ಅಭಿವೃದ್ಧಿ

ಅರ್ಜೆಂಟೀನಾ(ಮೇ.20): ಕೊರೋನಾ ವೈರಸ್ ಸೋಂಕು ಉದ್ಭವಿಸಿದ ಐದು ತಿಂಗಳಾದರೂ ಈಗಲೂ ಜಗತ್ತಿನ ವಿವಿಧೆಡೆ ಪರೀಕ್ಷಾ ಕಿಟ್​​ಗಳು ಅಭಿವೃದ್ಧಿಗೊಳ್ಳುತ್ತಲೇ ಇವೆ. ಹಿಂದೆ ಹಲವು ದಿನಗಳವರೆಗೂ ಪರೀಕ್ಷೆಯ ರಿಸಲ್ಟ್​ಗೆ ಕಾಯುವ ಸ್ಥಿತಿ ಇತ್ತು. ಈಗ ಒಂದೇ ದಿನದಲ್ಲಿ ರಿಸಲ್ಟ್ ಕೊಡಬಲ್ಲ ಕಿಟ್​ಗಳಿವೆ. ಇನ್ನೂ ವೇಗವಾಗಿ ಫಲಿತಾಂಶ ಕೊಡುವ ಕಿಟ್​ಗಳಿದ್ದರೆ ಕೊರೋನಾ ವಿರುದ್ಧ ಹೋರಾಟಕ್ಕೆ ಸಹಕಾರಿಯಾಗುತ್ತದೆ ಎಂಬುದು ವೈದ್ಯರ ಅಭಿಪ್ರಾಯ. ಇದೇ ಸಂದರ್ಭದಲ್ಲಿ ಅರ್ಜೆಂಟೀನಾ ದೇಶದ ವಿಜ್ಞಾನಿಗಳು ಎರಡನೇ ಗಂಟೆಯಲ್ಲಿ ಫಲಿತಾಂಶ ನೀಡಬಲ್ಲ ಪರೀಕ್ಷಾ ಕಿಟ್​​ಗಳನ್ನ ಅಭಿವೃದ್ಧಿಪಡಿಸುತ್ತಿದ್ದಾರೆ.

ಇದು ಬಹಳ ವೇಗವಾಗಿ ಫಲಿತಾಂಶ ನೀಡುತ್ತದೆ. ಬಹಳ ಅಗ್ಗವೂ ಹೌದು. ದೊಡ್ಡ ಪ್ರಮಾಣದಲ್ಲಿ ಟೆಸ್ಟಿಂಗ್ ನಡೆಸಲು ಇದು ಅನುಕೂಲವಾಗುತ್ತದೆ ಎಂದು ಈ ಯೋಜನೆಯಲ್ಲಿ ತೊಡಗಿಸಿಕೊಂಡಿರುವ ವಿಜ್ಞಾನಿಗಳು ತಿಳಿಸುತ್ತಾರೆ.

ಅಂದಹಾಗೆ, ನಿಯೋಕಿಟ್-ಕೋವಿಡ್-19 ಎಂದು ಕರೆಯುವ ಈ ಹೊಸ ಪರೀಕ್ಷಾ ಕಿಟ್ ಅನ್ನು ಪಾಬ್ಲೋ ಕಸ್ಸಾರ ಫೌಂಡೇಶನ್ ಎಂಬ ಸಂಸ್ಥೆ ಅಭಿವೃದ್ಧಿಪಡಿಸಿದೆ. ಈ ಕಿಟ್ ಬಹಳ ಸರಳ, ಅಗ್ಗ ಹಾಗೂ ಸುಲಭವಾಗಿ ಲಭ್ಯವಿರುವ ತಂತ್ರಜ್ಞಾನ ಹೊಂದಿದೆ ಎಂದು ಸಂಸ್ಥೆಯ ವಿಜ್ಞಾನಿ ಸ್ಯಾಂಟಿಯಾಗೋ ವೆರ್ಬಾಜ್ ಹೇಳುತ್ತಾರೆ.

ನಿಯೋಕಿಟ್​ನ ಬೆಲೆ ಸುಮಾರು 8 ಡಾಲರ್ ಆಗಬಹುದು. ಭಾರತೀಯ ರೂಪಾಯಿಗೆ ಪರಿವರ್ತಿಸಿದರೆ ಇದು ಸುಮಾರು 600 ರೂಪಾಯಿ ಆಗಬಹುದು.

ಇದನ್ನೂ ಓದಿ : ದೇಶದಲ್ಲಿ ದಾಖಲೆ ಪ್ರಮಾಣದಲ್ಲಿ ಏರುತ್ತಿರುವ ಕೊರೋನಾ; ನಿನ್ನೆ ಒಂದೇ ದಿನ‌ 5,611 ಕೇಸ್

ಅರ್ಜೆಂಟೀನಾ ವಿಜ್ಞಾನಿಗಳ ಈ ಆವಿಷ್ಕಾರಕ್ಕೆ ಜಗತ್ತಿನ ವಿವಿಧ ರಾಷ್ಟ್ರಗಳು ಆಸಕ್ತಿ ತೋರಿಸಿವೆಯಂತೆ. ನೆರೆಯ ದೇಶಗಳಿಗೆ ಮಾತ್ರವಲ್ಲ, ಬೇರೆ ದೇಶಗಳಿಗೂ ಈ ಕಿಟ್ ಪೂರೈಸಲು ಸಿದ್ಧರಿದ್ದೇವೆ. ಈ ಕಿಟ್ ಬಗ್ಗೆ ಆಸಕ್ತಿ ಇರುವ ದೇಶಗಳ ರಾಯಭಾರಿಗಳ ಜೊತೆ ಸಂಪರ್ಕ ಇಟ್ಟುಕೊಂಡಿದ್ದೇವೆ ಎಂದು ಅರ್ಜೆಂಟೀನಾದ ವಿಜ್ಞಾನ-ತಂತ್ರಜ್ಞಾನ ಸಚಿವ ರಾಬರ್ಟೋ ಸಲ್ವಾರೆಜಾ ಹೇಳಿದ್ದಾರೆ.