UIDAI: ಯುಐಡಿಎಐ ಎಂದರೇನು? ಆಧಾರ್ ಕಾರ್ಡ್ ಸಂಖ್ಯೆಗೆ ನೋಂದಣಿ ಮಾಡಿಕೊಳ್ಳುವುದು ಹೇಗೆ?

ಈಗಂತೂ ಪ್ರತಿಯೊಬ್ಬ ಭಾರತದ ಪ್ರಜೆಯ ಹತ್ತಿರ ಆಧಾರ್ ಕಾರ್ಡ್ (Aadhar Card) ಇರಲೇಬೇಕು,  ಭಾರತದ ಪ್ರಜೆ ಎನ್ನುವುದಕ್ಕೆ ಅದೊಂದು ಮಹತ್ವದ ಗುರುತಿನ ಚೀಟಿ (Identity Card) ಆಗಿದೆ. ಚಿಕ್ಕ ಮಕ್ಕಳಿಂದ ಹಿಡಿದು ವಯೋ ವೃದ್ದರವರೆಗೆ ಎಲ್ಲರೂ ಕಡ್ಡಾಯವಾಗಿ ಮಾಡಿಸಲೇಬೇಕಾದಂತಹ ಗುರುತಿನ ಚೀಟಿಯಾಗಿದೆ. ಭಾರತದ (India) ವಿಶಿಷ್ಟ ಗುರುತು ಪ್ರಾಧಿಕಾರ (Unique Identification Authority of India) ದೇಶದ ಎಲ್ಲಾ ನಿವಾಸಿಗಳಿಗೆ ವಿಶಿಷ್ಟ ಗುರುತು (UID) ಅಥವಾ ಆಧಾರ್ ಸಂಖ್ಯೆಗಳನ್ನು (Aadhaar Numbers) ನೀಡುವ ಜವಾಬ್ದಾರಿಯನ್ನು ಹೊತ್ತಿದೆ.

2016ರಲ್ಲಿ ಸಂಸ್ಥೆ ರಚನೆ

ಆಧಾರ್ ಕಾಯ್ದೆ, 2016 ರ ನಿಬಂಧನೆಗಳ ಅಡಿಯಲ್ಲಿ ಭಾರತ ಸರ್ಕಾರವು ಈ ಸಂಸ್ಥೆಯನ್ನು ರಚಿಸಿದೆ. ಇದು ಪ್ರಸ್ತುತ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯದ (ಎಂಇಐಟಿವೈ) ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಇದರ ನೋಂದಣಿ ಮತ್ತು ದೃಢೀಕರಣ ಸೇರಿದಂತೆ ಆಧಾರ್ ಕಾರ್ಡ್ ಮಾಡಿಸುವ ಎಲ್ಲಾ ಹಂತಗಳ ನಿರ್ವಹಣೆಗೆ ಯುಐಡಿಎಐ ಜವಾಬ್ದಾರವಾಗಿರುತ್ತದೆ.

ಯುಐಡಿಎಐ ಆಧಾರ್ ಸಂಖ್ಯೆಗಳನ್ನು ನೀಡುವ ನೀತಿ, ಕಾರ್ಯವಿಧಾನ ಮತ್ತು ಚೌಕಟ್ಟನ್ನು ರೂಪಿಸುವಲ್ಲಿ ಮತ್ತು ನೋಂದಾಯಿತ ವ್ಯಕ್ತಿಗಳ ಡೇಟಾ ಸುರಕ್ಷತೆಯನ್ನು ರೂಪಿಸುವಲ್ಲಿ ತೊಡಗಿಸಿಕೊಂಡಿದೆ.

ಇದನ್ನೂ ಓದಿ:  Aadhaar News: ಇಂಥವರ ಆಧಾರ್​ ಕಾರ್ಡ್ ತಕ್ಷಣ​ ರದ್ದು, UIDAI ಹೊಸ ರೂಲ್ಸ್​!

ನಕಲಿ ಗುರುತುಗಳನ್ನು ತೊಡೆದು ಹಾಕುವ ಉದ್ದೇಶ 

ನಕಲಿ ಗುರುತುಗಳನ್ನು ತೊಡೆದು ಹಾಕಲು ಯುಐಡಿ ಸಂಖ್ಯೆಗಳ ದೃಢವಾದ ವ್ಯವಸ್ಥೆಯನ್ನು ರಚಿಸುವುದು ಯುಐಡಿಎಐನ ಉದ್ದೇಶವಾಗಿದೆ. ಆಧಾರ್ ಸಂಖ್ಯೆಗಳ ಮತ್ತೊಂದು ಉದ್ದೇಶವೆಂದರೆ ನಿವಾಸಿಗಳಿಗೆ ಗುರುತಿನ ಪುರಾವೆಗಳನ್ನು ಒದಗಿಸುವುದು.

ಅದನ್ನು ಸುಲಭ, ವೆಚ್ಚ-ಪರಿಣಾಮಕಾರಿ ರೀತಿಯಲ್ಲಿ ಪರಿಶೀಲಿಸಬಹುದು. ಅಧಿಕೃತ ಅಂಕಿ ಅಂಶಗಳ ಪ್ರಕಾರ ಯುಐಡಿಎಐ ನವೆಂಬರ್ 30, 2022 ರ ವೇಳೆಗೆ 135 ಕೋಟಿ ಆಧಾರ್ ಸಂಖ್ಯೆಗಳನ್ನು ನೀಡಿದೆ ಎಂದು ತಿಳಿದುಬಂದಿದೆ.

ನೋಂದಣಿ ಮಾಡಿಕೊಳ್ಳುವುದು ಹೇಗೆ?

ಯುಐಡಿಎಐ ಮತ್ತು ರಿಜಿಸ್ಟ್ರಾರ್ ಜನರಲ್ ಆಫ್ ಇಂಡಿಯಾ (ಆರ್‌ಜಿಐ) ಕಚೇರಿಯು ಭಾರತದ ಪ್ರತಿಯೊಂದು ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶದಲ್ಲಿ ಆಧಾರ್ ನೋಂದಣಿಯನ್ನು ಒಳಗೊಂಡಿದೆ.

• ಆಧಾರ್ ಸಂಖ್ಯೆಗೆ ಅರ್ಜಿ ಸಲ್ಲಿಸಲು, ವ್ಯಕ್ತಿಯು ಯಾವುದೇ ಆನ್ಲೈನ್ ಅಪಾಯಿಂಟ್ಮೆಂಟ್ ನೊಂದಿಗೆ ಅಥವಾ ಅದು ಇಲ್ಲದೆ ಅಧಿಕೃತ ದಾಖಲಾತಿ ಕೇಂದ್ರಕ್ಕೆ ಹೋಗಬಹುದು.


• ಅಲ್ಲಿಗೆ ತಮ್ಮ ಗುರುತು ಮತ್ತು ವಿಳಾಸ ಪುರಾವೆಗಳನ್ನು ತಮ್ಮೊಂದಿಗೆ ಕೊಂಡೊಯ್ಯಬೇಕು.


• ಚುನಾವಣಾ ಫೋಟೋ ಗುರುತಿನ ಚೀಟಿ, ಪಡಿತರ ಚೀಟಿ ಮತ್ತು ಪಾಸ್‌ಪೋರ್ಟ್ ಅಂತಹ ಕೆಲವು ಸಾಮಾನ್ಯ ಪುರಾವೆಗಳನ್ನು ತೆಗೆದುಕೊಂಡು ಹೋಗಬೇಕು. ಮನೆ ವಿಳಾಸ ಪುರಾವೆಗಳು ಕಳೆದ ಮೂರು ತಿಂಗಳ ನೀರಿನ ಅಥವಾ ವಿದ್ಯುತ್ ಬಿಲ್ ಗಳಂತಹ ದಾಖಲೆಗಳನ್ನು ಒಳಗೊಂಡಿರುತ್ತದೆ.


• ಆಧಾರ್ ಕೇಂದ್ರದಲ್ಲಿ, ಅರ್ಜಿ ನಮೂನೆಯಲ್ಲಿ ನಿಮ್ಮ ವಿವರಗಳನ್ನು ಭರ್ತಿ ಮಾಡಿ.


• ಗುರುತು ಮತ್ತು ವಿಳಾಸ ಪುರಾವೆಗಳೊಂದಿಗೆ ಅದನ್ನು ಕೇಂದ್ರದಲ್ಲಿ ಸಲ್ಲಿಸಿ.


• ಇದರ ನಂತರ, ಕೇಂದ್ರದಲ್ಲಿ ಹಾಜರಿರುವ ಅಧಿಕಾರಿ ನಿಮ್ಮ ಬಯೋಮೆಟ್ರಿಕ್ ಡೇಟಾವನ್ನು ತೆಗೆದುಕೊಳ್ಳುತ್ತಾರೆ, ಇದರಲ್ಲಿ ನಿಮ್ಮ ಫೋಟೋ, ಫಿಂಗರ್ಪ್ರಿಂಟ್ ಗಳು ಮತ್ತು ಐರಿಸ್ ಸ್ಕ್ಯಾನ್ ಗಳು ಸಹ ಸೇರಿರುತ್ತವೆ.


• ಇದರ ನಂತರ, ಅರ್ಜಿದಾರರು 14-ಅಂಕಿಯ ದಾಖಲಾತಿ ಸಂಖ್ಯೆಯೊಂದಿಗೆ ಸ್ವೀಕೃತಿ ಚೀಟಿಯನ್ನು ಪಡೆಯುತ್ತಾರೆ. ಇದನ್ನು ಬಳಸಿಕೊಂಡು ಅವರ ಅಪ್ಲಿಕೇಶನ್ ಸ್ಟೇಟಸ್​ ಟ್ರ್ಯಾಕ್ ಮಾಡಬಹುದು.

ಅರ್ಹ ದಾಖಲೆಗಳನ್ನು ಹೊಂದಿರದ ವ್ಯಕ್ತಿಯ ಕೂಡ,  ಕುಟುಂಬದ ಅರ್ಹತಾ ದಾಖಲೆಯಲ್ಲಿ ಅವರ ಹೆಸರಿದ್ದರೆ ಅವರು ಸಹ ನೋಂದಾಯಿಸಿಕೊಳ್ಳಬಹುದು. ಅರ್ಹತಾ ದಾಖಲೆಯಲ್ಲಿ ಕುಟುಂಬದ ಮುಖ್ಯಸ್ಥರು ಮೊದಲು ಮಾನ್ಯತೆಯುಳ್ಳ ಗುರುತು ಮತ್ತು ವಿಳಾಸ ಪುರಾವೆಗಳನ್ನು ಬಳಸಿಕೊಂಡು ಆಧಾರ್ ಸಂಖ್ಯೆಯನ್ನು ಪಡೆಯಬೇಕಾಗುತ್ತದೆ.