PAN-Aadhaar Link ಮಾಡಿಲ್ವಾ? ಹಾಗಾದ್ರೆ ಮತ್ತೆ ವಿಸ್ತರಣೆಯಾಗುತ್ತಾ ದಿನಾಂಕ? ಇಲ್ಲಿದೆ ಮಹತ್ವದ ಮಾಹಿತಿ

ಈಗಾಗಲೇ ಹಲವು ದಿನಗಳಿಂದ ಎಲ್ಲೆಡೆ ಆಧಾರ್ ಹಾಗೂ ಪ್ಯಾನ್ (Aadhaar-PAN link) ಸಂಖ್ಯೆಯನ್ನು ಜೋಡಿಸುವಂತೆ ಸಾಕಷ್ಟು ಅರಿವು ಮೂಡಿಸಲಾಗಿದೆ. ಅಲ್ಲದೆ ಇದಕ್ಕಾಗಿ ಗಡುವನ್ನು (Last date) ನೀಡಲಾಗಿತ್ತು. ಇದೀಗ ಈ ಗಡುವು ಹತ್ತಿರ ಬರುತ್ತಿದ್ದಂತೆ ಈ ದಿನಾಂಕವನ್ನು ಇನ್ನೊಮ್ಮೆ ವಿಸ್ತರಿಸಬೇಕೆಂಬ ಬೇಡಿಕೆ ಹೆಚ್ಚಾಗ ತೊಡಗಿದೆ. ಆದರೆ ಈ ವರ್ಷ ಈ ದಿನಾಂಕ ಇನ್ನೊಮ್ಮೆ ವಿಸ್ತರಿಸುವ ನಿರೀಕ್ಷೆ ಇಲ್ಲ. ಈಗಾಗಲೇ ಗಮನಿಸಿದರೆ PAN-Aadhaar ಜೋಡಣೆ ಮಾಡುವುದಕ್ಕೆ ಸಂಬಂಧಿಸಿದಂತೆ ಕಳೆದ ವರ್ಷದಿಂದ ಹಲವು ಬಾರಿ ದಿನಾಂಕಗಳನ್ನು ಸೆಂಟ್ರಲ್ ಬೋರ್ಡ್ ಆಫ್ ಡೈರೆಕ್ಟ್ ಟ್ಯಾಕ್ಸಸ್ (Central Board of Direct Taxes ) ಇಲಾಖೆಯು ವಿಸ್ತರಿಸಿತ್ತು.

ಈ ಪ್ಯಾನ್-ಆಧಾರ್ ಲಿಂಕ್ ಇಲ್ಲಿಯವರೆಗೂ ಇನ್ನೂ ಲಿಂಕ್ ಮಾಡದೇ ಇರುವವರು ಅದನ್ನು ಈ ತಿಂಗಳು ಅಂದರೆ ಮಾರ್ಚ್ 31ರ ವರೆಗೂ ಮಾಡಬಹುದಾಗಿದೆ. ಈ ಅವಧಿಯೊಳಗೂ ಯಾರೇ ಆಗಲಿ ತಮ್ಮ ಆಧಾರ್ ಹಾಗೂ ಪ್ಯಾನ್ ಸಂಖ್ಯೆಯನ್ನು ಲಿಂಕ್ ಮಾಡದೆ ಹೋದಲ್ಲಿ ಅವರ ಪಾನ್ ಸಂಖ್ಯೆಯು ಬರುವ ಏಪ್ರಿಲ್ 1, 2023 ರಿಂದ ನಿಷ್ಕ್ರಿಯಯವಾಗಲಿದೆ.

ಪ್ಯಾನ್ ಕಾರ್ಡ್​ ಮಹತ್ವದ ದಾಖಲೆ

ಶಾಶ್ವತ ಖಾತೆ ಸಂಖ್ಯೆ ಅಥವಾ ಸರಳವಾಗಿ ಹೇಳಬೇಕೆಂದರೆ ಪ್ಯಾನ್​ ಕಾರ್ಡ್ ಎಂಬುದು ಬಲು ಮಹತ್ವದ ದಾಖಲೆಯಾಗಿದೆ. ಪ್ರತಿಯೊಬ್ಬರ ಬ್ಯಾಂಕಿಂಗ್ ವ್ಯವಹಾರಗಳಿಗೆ ಹಾಗೂ ತೆರಿಗೆ ವಿಧಿ ವಿಧಾನಗಳಿಗೆ ಕಡ್ಡಾಯವಾಗಿ ಬಳಸಲಾಗುವ ದಾಖಲೆಯಾಗಿದೆ. ಹಾಗಾಗಿ ಈಗಾಗಲೇ ನೀಡಿರುವ ಗಡುವು ಮೀರುವುದರೊಳಗೆ ಲಿಂಕ್ ಮಾಡಿಕೊಂಡಲ್ಲಿ ನಿಮಗೆ ಭವಿಷ್ಯದಲ್ಲಿ ಉಂಟಾಗಬಹುದಾದ ಅನಾನುಕೂಲತೆಗಳನ್ನು ತಪ್ಪಿಸಿಕೊಳ್ಳಬಹುದು.

ಈ ಹಿಂದೆ ಫೈನಾನ್ಶಿಯಲ್ ಎಕ್ಸ್ ಪ್ರೆಸ್ ಮಾಧ್ಯಮವು ಹಿರಿಯ ಅಧಿಕಾರಿಯೋರ್ವರನ್ನು ಉಲ್ಲೇಖಿಸಿ ಇನ್ನು ಮುಂದೆ ಪ್ಯಾನ್​-ಆಧಾರ್ ಜೋಡಣೆ ದಿನಾಂಕವನ್ನು ಇನ್ನೊಮ್ಮೆ ವಿಸ್ತರಿಸಲಾಗದು ಎಂದು ವರದಿ ಮಾಡಿತ್ತು. ಆದಾಗ್ಯೂ ಸಮಯ ಸಂದರ್ಭ ನೋಡಿಕೊಂಡು ಕಡೆ ಘಳಿಗೆಯಲ್ಲಿ ಆಗಬಹುದಾದ ಬದಲಾವಣೆಯನ್ನು ಹಿರಿಯ ಅಧಿಕಾರಿ ತಳ್ಳಿ ಹಾಕಿರಲಿಲ್ಲ ಎಂದು  ವೆಬ್​ಸೈಟ್​ ವರದಿ ಮಾಡಿತ್ತು.

ಇದನ್ನೂ ಓದಿ: Aadhaar Card: ಇನ್ಮುಂದೆ ಯಾವುದೇ ದಾಖಲೆ ಇಲ್ಲದೇ ಆಧಾರ್​ ಕಾರ್ಡ್ ಮಾಡಿಸಬಹುದು!

ಪಾನ್-ಆಧಾರ್ ಜೋಡಣೆ ಏಕೆ ಮಹತ್ವವಾಗಿದೆ?

ಈಗಾಗಲೇ ನಿಮಗೆ ಗೊತ್ತಿರುವಂತೆ ಇಂದಿನ ದಿನಮಾನಗಳಲ್ಲಿ ಯಾವುದೇ ರೀತಿಯ ಬ್ಯಾಂಕಿಂಗ್ ಹಣಕಾಸಿನ ವ್ಯವಹಾರ ಬಂದಾಗ ಕೆವೈಸಿ ಎಂಬುದು ಮಹತ್ವವಾಗಿದೆ. ಹಾಗಾಗಿ ಪ್ರತಿಯೊಬ್ಬರಿಗೂ ನೋ ಯುವರ್ ಕಸ್ಟಮರ್ (ಕೆವೈಸಿ) ಬಗ್ಗೆ ತಿಳಿದೇ ಇದೆ. ಪ್ಯಾನ್​ ಜೋಡಣೆಯೂ ಸಹ ಈಗ ಕೆವೈಸಿಯ ಭಾಗವಾಗಿರುವುದರಿಂದ ಇದು ಬಲು ಮಹತ್ವದ್ದಾಗಿದೆ.

ಅಲ್ಲದೆ, ಪ್ಯಾನ್​ ದಾಖಲೆಗಳ ನಕಲಿ ಹಾವಳಿಯನ್ನು ತಡೆಯಲೂ ಸಹ ಈ ಜೋಡಣೆ ಪ್ರಕ್ರಿಯೆ ಮುಖ್ಯವಾಗಿದೆ. ಈ ಹಿಂದೆ ಒಬ್ಬ ವ್ಯಕ್ತಿಗೆ ಬಹು ಪ್ಯಾನ್​ ಸಂಖ್ಯೆಗಳನ್ನು ನೀಡಿರುವ ಉದಾಹರಣೆಗಳಿವೆ. ಹಾಗಾಗಿ ಇದನ್ನು ತಡೆಯಲೂ ಸಹ ಪ್ಯಾನ್-ಆಧಾರ್ ಜೋಡಣೆ ಮಹತ್ವದ್ದಾಗಿದೆ.

ನಿಷ್ಕ್ರಿಯಗೊಂಡರೆ ಏನು ಸಮಸ್ಯೆ?

ಯಾರದ್ದೇ ಆಗಲಿ ಪಾನ್ ಸಂಖ್ಯೆ ಒಂದೊಮ್ಮೆ ನಿಷ್ಕ್ರಿಯಗೊಂಡರೆ ಆ ವ್ಯಕ್ತಿಗೆ ತೆರಿಗೆ ರಿಟರ್ನ್ ಸಲ್ಲಿಸಲು ಸಾಧ್ಯವಾಗುವುದಿಲ್ಲ. ಈ ರೀತಿ ರಿಟರ್ನ್ ಸಲ್ಲಿಸದೆ ಇದ್ದಾಗ ಆ ವ್ಯಕ್ತಿಯ ಆದಾಯ ತೆರಿಗೆ ಮರುಪಾವತಿ ಪ್ರಕ್ರಿಯೆ ಸಕ್ರಿಯವಾಗುವುದೇ ಇಲ್ಲ. ಅಲ್ಲದೆ ಪ್ಯಾ ನ್ ಇಲ್ಲದೆ ಐಟಿಆರ್ ಸಲ್ಲಿಸಬಯಸುವವರು ಹೆಚ್ಚಿನ ದರ ತೆರಬೇಕಾಗುತ್ತದೆ.

ಈ ಮೇಲಿನ ಅಂಶಗಳನ್ನು ಹೊರತುಪಡಿಸಿ SEBI ನಿಯಮಗಳನುಸಾರವಾಗಿ ಸುರಕ್ಷಿತ ಮಾರುಕಟ್ಟೆಗಳಲ್ಲಿ ತಮ್ಮ ವ್ಯವಹಾರ ನಡೆಸ ಬಯಸಿದಲ್ಲಿ ಅವರು ಕಡ್ಡಾಯವಾಗಿ ಪ್ಯಾನ್​ ಹೊಂದಿರಬೇಕಾಗಿರುತ್ತದೆ. ಇದಿಲ್ಲದೆ ಅವರು ಮಾರುಕಟ್ಟೆಯಲ್ಲಿ ಭಾಗವಹಿಸಲಾಗದು. ಪರಿಸ್ಥಿತಿ ಹೀಗಿರುವಾಗ ಅಂಥವರು ಮಾನ್ಯವಾದ ಪ್ಯಾನ್​ ಹೊಂದಿರಬೇಕಾಗುತ್ತದೆ ಹಾಗೂ  ಪ್ಯಾನ್​ ಮಾನ್ಯತೆ ಇರಬೇಕೆಂದಾದಲ್ಲಿ ಅವರು ತಮ್ಮ ಪ್ಯಾನ್​ ಅನ್ನು ತಮ್ಮ ಆಧಾರ್ ನೊಂದಿಗೆ ಲಿಂಕ್ ಮಾಡುವುದು ಬಲು ಮಹತ್ವವಾಗಿದೆ.

ಇವರು ಪಾನ್-ಆಧಾರ್ ಲಿಂಕ್ ಮಾಡದೆ ಇರಬಹುದು

ದೇಶದ ಅಸ್ಸಾಂ, ಜಮ್ಮು ಮತ್ತು ಕಾಶ್ಮೀರ, ಮತ್ತು ಮೇಘಾಲಯ ಈ ಪ್ರದೇಶಗಳಲ್ಲಿ ವಾಸಿಸುವ ಜನರಿಗೆ ಪ್ಯಾನ್​-ಆಧಾರ್ ಲಿಂಕ್ ಮಾಡುವ ಪ್ರಕ್ರಿಯೆಯಿಂದ ವಿನಾಯಿತಿ ನೀಡಲಾಗಿದೆ. ಇವರಲ್ಲದೆ, ಅನಿವಾಸಿ ಭಾರತೀಯರು ಹಾಗೂ 80ಕ್ಕಿಂತಲೂ ಹೆಚ್ಚಿನ ವಯೋಮಾನದವರು  ಪ್ಯಾನ್-ಆಧಾರ್ ಲಿಂಕ್ ಮಾಡುವ ಪ್ರಕ್ರಿಯೆಯಿಂದ ವಿನಾಯಿತಿ ಪಡೆದಿರುತ್ತಾರೆ.

ಒಟ್ಟಿನಲ್ಲಿ ಹೇಳಬೇಕೆಂದರೆ ಈಗಲೂ ಪ್ಯಾನ್-ಆಧಾರ್ ಜೋಡಣೆ ಮಾಡಲು ಕೆಲವು ದಿನಗಳು ಅಂದರೆ ಮಾರ್ಚ್ 31 ರ ವರೆಗೆ ಕಾಲಾವಧಿಯಿದ್ದು ಅದನ್ನು ಈಗಲೇ ಮಾಡಿಬಿಡಿ ಹಾಗೂ ಮತ್ತೊಮ್ಮೆ ದಿನಾಂಕ ವಿಸ್ತರಣೆ ಆಗಬಹುದೆಂಬ ಮನಸ್ಥಿತಿಯಿಂದ ಹೊರಬನ್ನಿ.