Business Ideas: ಸಾವಯವ ಬೇಬಿ ಫುಡ್‌ ಪ್ರಾಡಕ್ಟ್‌ ಬ್ಯುಸಿನೆಸ್, ತಿಂಗಳಿಗೆ ಲಕ್ಷಾಂತರ ಆದಾಯ ಗಳಿಸ್ತಿರೋ ಯಶಸ್ವಿ ಉದ್ಯಮಿ ಈ ಮಹಿಳೆ!

ಒಮ್ಮೊಮ್ಮೆ ನಮಗೇ ಕೆಲವೊಂದು ಸಮಸ್ಯೆಗಳು (Problems) ಬಂದಾಗ ಅದಕ್ಕೆ ಪರಿಹಾರವನ್ನು ಹುಡುಕುತ್ತೇವೆ. ಹಾಗೆ ಪರಿಹಾರದ ಬಗ್ಗೆ ರಿಸರ್ಚ್‌ (Research) ಮಾಡುವುದು ಬಹಳಷ್ಟು ಸಲ ನಮ್ಮ ಜೀವನದ ತಿರುವಿಗೆ ಕಾರಣವಾಗುತ್ತದೆ. ಬೆಂಗಳೂರಿನ (Bengaluru) ಶ್ರೀದೇವಿ ಆಶಲಾ (Sridevi Ashala) ಅವರ ಬದುಕಿನಲ್ಲಿ ಆಗಿದ್ದೂ ಅದೇ. ಅದೇ ತಿರುವಿನಿಂದ ಇಂದು ಅವರು ಲಕ್ಷಾಂತರ ರೂ. ಆದಾಯ ನೀಡುವಂತ ಉದ್ಯಮ ನಡೆಸುತ್ತಿದ್ದಾರೆ. ಶ್ರೀದೇವಿ ಆಶಲಾ ಅವರು ಮೊದಲೆಲ್ಲ ಬೆಂಗಳೂರಿನಾದ್ಯಂತ ಹೊಸ ಹೊಸ ಹೊಟೇಲ್‌ (Hotel) , ರೆಸ್ಟೋರೆಂಟ್‌ (Restaurant) ಗಳನ್ನು ಹುಡುಕಿ ವೆರೈಟಿ ಫುಡ್‌ಗಳನ್ನು (Variety Food) ಟ್ರೈ ಮಾಡುತ್ತಿದ್ದರು. ಆದ್ರೆ ಅನಾರೋಗ್ಯಕರ ಆಹಾರದಿಂದ ಅವರಿಗೆ ಗರ್ಭಪಾತವಾಗಿತ್ತು. ಇದಕ್ಕೆ ಅನಾರೋಗ್ಯಕರ ಜೀವನಶೈಲಿ ಕಾರಣವಾಗಿರಬಹುದು ಎಂಬುದಾಗಿ ವೈದ್ಯರು ಹೇಳಿದ್ದರು. ಈ ಘಟನೆ ಅವರನ್ನು ಎಚ್ಚರಗೊಳ್ಳುವಂತೆ ಮಾಡಿತ್ತು.

ಇದಾದ ಬಳಿಕ ದಂಪತಿ ಪೌಷ್ಟಿಕ ಆಹಾರ, ಪೋಷಣೆ ಮತ್ತು ಯೋಗದ ಸಹಾಯದಿಂದ ಆರೋಗ್ಯಕರ ಜೀವನಶೈಲಿಯನ್ನು ನಡೆಸಲು ಪ್ರಾರಂಭಿಸಿದರು. "ನಾನು ನನ್ನ ಆರೋಗ್ಯದ ಬಗ್ಗೆ ಕಾಳಜಿ ವಹಿಸಲು ಪ್ರಾರಂಭಿಸಿದೆ. ನಾನು ಖರೀದಿಸುವ ಎಲ್ಲ ಪದಾರ್ಥಗಳ ಪೌಷ್ಟಿಕಾಂಶದ ಮಾಹಿತಿಯನ್ನು ಪರಿಶೀಲಿಸುವ ಅಭ್ಯಾಸ ಬೆಳೆಸಿಕೊಂಡೆ” ಎಂದು ನೆನಪಿಸಿಕೊಳ್ಳುತ್ತಾರೆ ಶ್ರೀದೇವಿ.

ಮಕ್ಕಳ ಆಹಾರದಲ್ಲಿ ಹೆಚ್ಚಿನ ರಾಸಾಯನಿಕ!

“ನನ್ನ ಪ್ರತಿ ಆಹಾರದ ಬಗ್ಗೆ ಕಾಳಜಿ ವಹಿಸುತ್ತಿದ್ದ ನನಗೆ ಮಕ್ಕಳ ಆಹಾರದಲ್ಲಿನ ರಾಸಾಯನಿಕಗಳ ಪ್ರಮಾಣ ನೋಡಿ ಆಶ್ಚರ್ಯವಾಯಿತು. ಮಗುವಿಗೆ ಇಷ್ಟು ರಾಸಾಯನಿಕಗಳನ್ನು ಹೇಗೆ ತಿನ್ನಿಸಬಹುದೆಂದು ನಾನು ಯೋಚಿಸುತ್ತಿದ್ದೆ ಎಂದು ಅವರು ಹೇಳುತ್ತಾರೆ.

ಇತ್ತೀಚಿನ ಅಧ್ಯಯನದ ಪ್ರಕಾರ ಹೆಚ್ಚಿನ ಮಗುವಿನ ಆಹಾರಗಳು 65% ಆರ್ಸೆನಿಕ್, 58% ಕ್ಯಾಡ್ಮಿಯಂ, 36% ಸೀಸ ಮತ್ತು 10% ಅಕ್ರಿಲಾಮೈಡ್ ಅನ್ನು ಒಳಗೊಂಡಿವೆ. ಈ ರಾಸಾಯನಿಕಗಳು ಮಗುವಿನ ಮೆದುಳಿನಲ್ಲಿ ಸಮಸ್ಯೆಗಳನ್ನು ಉಂಟುಮಾಡಬಹುದು.

ಸಾವಯವ ಬೇಬಿ ಫುಡ್‌ ಪ್ರಾಡಕ್ಟ್‌ ಬ್ಯುಸಿನೆಸ್‌!

ಇಂದು ಅನೇಕ ಕಾಯಿಲೆಗಳಿಗೆ ಕಲಬೆರಕೆ ಆಹಾರ, ಅನಾರೋಗ್ಯಕರ ಜೀವನಶೈಲಿ, ರಾಸಾಯನಿಕಗಳು ಮತ್ತು ಕೀಟನಾಶಕಗಳು ಕಾರಣ ಎಂದು ಶ್ರೀದೇವಿ ಹೇಳುತ್ತಾರೆ. "ಪ್ಯಾಕೇಜ್ ಮಾಡಲಾದ ಆಹಾರ, ವಿಶೇಷವಾಗಿ MNCಗಳ ಮಗುವಿನ ಆಹಾರ, ಬಲವರ್ಧನೆಯ ಹೆಸರಿನಲ್ಲಿ ಹೆಚ್ಚು ಸಂಸ್ಕರಿಸಲಾಗುತ್ತದೆ. ಅವು ರಾಸಾಯನಿಕಗಳಿಂದ ತುಂಬಿರುತ್ತದೆ. ಮಗುವಿನ ಆಹಾರದ ಈ ಕೃತಕ ಬಲವರ್ಧನೆಯು ಮೂತ್ರಪಿಂಡ ಮತ್ತು ಯಕೃತ್ತಿಗೆ ಸಮಸ್ಯೆಗಳನ್ನು ಉಂಟುಮಾಡುತ್ತದೆ. ಶಿಶುಗಳು ಈ ಟಾಕ್ಸಿನ್‌ಗಳನ್ನು ತೊಡೆದುಹಾಕಲು ಕಷ್ಟಪಡುತ್ತಾರೆ” ಎಂದು ಶ್ರೀದೇವಿ ಹೇಳುತ್ತಾರೆ.

“ಮೊಳಕೆಯ ಆಹಾರ ಬಲವರ್ಧನೆಯ ನೈಸರ್ಗಿಕ ಮಾರ್ಗವಾಗಿದೆ. ಇದು ಪೋಷಕಾಂಶಗಳನ್ನು ನೀಡುತ್ತದೆ. ಸಂಪೂರ್ಣವಾಗಿ ಜೈವಿಕವಾಗಿ ಲಭ್ಯವಾಗುವಂತೆ ಮಾಡುತ್ತದೆ, ಅಂದರೆ ದೇಹಕ್ಕೆ ಹೀರಿಕೊಳ್ಳಲು ಸುಲಭವಾಗಿದೆ” ಎಂದು ಅವರು ಹೇಳುತ್ತಾರೆ.

ಉದ್ಯಮಿಯಾಗಿ ಬದಲಾದ ತಾಯಿ

ಅಷ್ಟಕ್ಕೂ ಶ್ರೀದೇವಿಗೆ ಆರೋಗ್ಯಕರ ಆಹಾರವನ್ನು ತಯಾರಿಸುವುದು ಮತ್ತು ತನ್ನ ಮಕ್ಕಳ ಪೋಷಣೆ ಕಷ್ಟವಾಗಿತ್ತು. ಅದರಲ್ಲೂ ವಿಶೇಷವಾಗಿ ಎರಡನೇ ಹೆಣ್ಣುಮಗು ಜನಿಸಿದ ನಂತರದಲ್ಲಿ. ಹೀಗಾಗಿ ಅವರು ತಮ್ಮ ಸಾಫ್ಟ್‌ವೇರ್‌ ಕೆಲಸವನ್ನೂ ಬಿಡಬೇಕಾಯ್ತು. ಈ ನಿರ್ಧಾರವೇ 2019 ರಲ್ಲಿ 'ಟಮ್ಮಿ ಫ್ರೆಂಡ್ಲಿ ಫುಡ್ಸ್‌ ʼ ಎಂಬ ಬ್ರ್ಯಾಂಡ್‌ನ ಹುಟ್ಟಿಗೆ ಕಾರಣವಾಯ್ತ.

ಶಿಶುಗಳಿಗೆ ಗಂಜಿ ಮಿಶ್ರಣಗಳು ಮತ್ತು ಪ್ಯಾನ್‌ಕೇಕ್ ಮಿಶ್ರಣಗಳನ್ನು ಒಳಗೊಂಡಂತೆ ಸುಲಭವಾಗಿ ತಯಾರಿಸಬಹುದಾದ ಸಾವಯವ ಶಿಶು ಆಹಾರವನ್ನು ಮಾರಾಟ ಮಾಡಲು ಆರಂಭಿಸಿದರು. ಮಗುವಿನ ಆಹಾರದ ಜೊತೆಗೆ, ಮಧುಮೇಹ ಹೊಂದಿರುವ ರೋಗಿಗಳಿಗೆ ಆಹಾರದ ಮಿಶ್ರಣಗಳ ಮಾರಾಟವನ್ನೂ ಅವರು ಆರಂಭಿಸಿದರು.

ತಿಂಗಳಿಗೆ ಲಕ್ಷ ಆದಾಯ

ಶ್ರೀದೇವಿ, ಮೊದಲ ವರ್ಷವನ್ನು ಸಂಶೋಧನೆ ಮತ್ತು ಅಭಿವೃದ್ಧಿಯಲ್ಲೇ ಕಳೆದರು. ಅವರು ಅಭಿವೃದ್ಧಿಪಡಿಸುವ ಮಗುವಿನ ಆಹಾರದ ಪೌಷ್ಟಿಕಾಂಶದ ವಿಷಯವನ್ನು ಪರಿಶೀಲಿಸಲು ಆಂತರಿಕ ಪ್ರಯೋಗಾಲಯವನ್ನು ಸ್ಥಾಪಿಸಿದರು. ಇಲ್ಲಿಯವರೆಗೆ, ಶ್ರೀದೇವಿ ಕಂಪನಿಗೆ 1.5 ಕೋಟಿ ರೂಪಾಯಿಗಳನ್ನು ಹೂಡಿಕೆ ಮಾಡಿದ್ದಾರೆ. ಹಾಗೆಯೇ ತಿಂಗಳಿಗೆ ಸುಮಾರು 10 ಲಕ್ಷ ರೂಪಾಯಿಗಳನ್ನು ಗಳಿಸುತ್ತಿದ್ದಾರೆ.

ಒಟ್ಟಾರೆ... ಎರಡು ಮಕ್ಕಳ ತಾಯಾಗಿ ತಮ್ಮದೇ ಆದ ಯಶಸ್ವಿ ಉದ್ಯಮ ನಡೆಸುತ್ತಿರುವ ಶ್ರೀದೇವಿ ಅವರು ಇಂಥ ಹಲವಾರು ಮಹಿಳೆಯರಿಗೆ ಸ್ಪೂರ್ತಿಯಾಗುತ್ತಾರೆ.