Income Tax: ಮಾರ್ಚ್ 31ರೊಳಗೆ ಈ ಕೆಲಸಗಳನ್ನು ಪೂರ್ಣ ಮಾಡ್ಕೊಳ್ಳಿ; ಇಲ್ಲದೇ ಹೋದ್ರೆ ಜೇಬಿಗೆ ಬೀಳುತ್ತೆ ಕತ್ತರಿ

ಈ ಆದಾಯ ತೆರಿಗೆಯ ಕೆಲಸಗಳು (Income Tax) ಅಂತ ಹೇಳಿದರೆ ಸಾಕು ನಮ್ಮಲ್ಲಿ ಮುಖ ತಿರುಗಿಸುವ ಜನರೂ ಇದ್ದಾರೆ ಮತ್ತು ಇನ್ನೂ ಕೆಲವರು ಆದಾಯ ತೆರಿಗೆಯ ಕೆಲಸಗಳನ್ನು ಮೊದಲು ಮಾಡಿ ಮುಗಿಸಬೇಕು. ಇಲ್ಲವೆಂದರೆ ಅದಕ್ಕೆ ದಂಡ ಬೀಳುತ್ತದೆ ಅಂತ ಹೇಳುವವರೂ ಸಹ ಇದ್ದಾರೆ. ಕೆಲವರಿಗಂತೂ ಆದಾಯ ತೆರಿಗೆಯ ಯಾವ ಕೆಲಸಗಳ ಬಗ್ಗೆ ಇಲ್ಲಿ ಮಾತಾಡುತ್ತಿದ್ದೇವೆ ಅಂತ ಸಹ ಅರ್ಥವಾಗೋದಿಲ್ಲ. ಆದರೆ ಈಗ ನಿಮ್ಮ ಮುಖ ಆ ಕಡೆ ಈ ಕಡೆ ತಿರುಗಿಸಿದರೆ ಭಾರಿ ದಂಡ (ITR Filing) ಬೀಳುವುದಂತೂ ಗ್ಯಾರೆಂಟಿ. ಹೌದು, ಮಾರ್ಚ್ 31, 2023 ರೊಳಗೆ ಆದಾಯ ತೆರಿಗೆ ಕೆಲಸಗಳನ್ನು (Tax) ಪೂರ್ಣಗೊಳಿಸಬೇಕು. ಎಂದರೆ 2022-23ರ ಹಣಕಾಸು ವರ್ಷದ (Financial Year) ಅಂತ್ಯಕ್ಕೆ ಕೆಲವೇ ದಿನಗಳು ಇರುವುದರಿಂದ, ಯಾವುದೇ ಕೊನೆಯ ಕ್ಷಣದ ಅವಸರ ಅಥವಾ ದಂಡವನ್ನು ತಪ್ಪಿಸಲು ನೀವು ಪೂರ್ಣಗೊಳಿಸಬೇಕಾದ ಹಲವಾರು ಆದಾಯ ತೆರಿಗೆ ಸಂಬಂಧಿತ ಕೆಲಸಗಳು ಇಲ್ಲಿವೆ ನೋಡಿ.

ಹೊಸ ಹಣಕಾಸು ವರ್ಷ (2023-24) ಏಪ್ರಿಲ್ 1 ರಿಂದ ಪ್ರಾರಂಭವಾಗಲಿದ್ದು, 2022-23 ರ ಹಣಕಾಸು ವರ್ಷದಲ್ಲಿ ತೆರಿಗೆದಾರರು ಹಣಕಾಸು ವರ್ಷದ ಅಂತ್ಯವಾಗುವ ಮೊದಲು ಆ ಕೆಲಸಗಳನ್ನು ಪೂರ್ಣಗೊಳಿಸಬೇಕು.

ಫಾರ್ಮ್ 12ಬಿಬಿ ಸಲ್ಲಿಸಿ ಹೆಚ್ಚಿನ ಪ್ರೀಮಿಯಂ ವಿಮಾ ಪಾಲಿಸಿಗಳ ಮೇಲೆ ತೆರಿಗೆ ವಿನಾಯಿತಿ ಪಡೆಯಿರಿ

ವಾರ್ಷಿಕ ಪ್ರೀಮಿಯಂ 5 ಲಕ್ಷ ರೂಪಾಯಿಗಿಂತ ಹೆಚ್ಚಿನ ವಿಮಾ ಪಾಲಿಸಿಯನ್ನು ನೀವು ತೆಗೆದುಕೊಂಡಿದ್ದರೆ, ಏಪ್ರಿಲ್ 1 ರ ನಂತರ ಮೆಚ್ಯೂರಿಟಿ ಮೊತ್ತದ ಮೇಲೆ ಯಾವುದೇ ತೆರಿಗೆ ವಿನಾಯಿತಿ ಇರುವುದಿಲ್ಲ. ಬಜೆಟ್ 2023 ರ ಪ್ರಕಟಣೆಯ ಪ್ರಕಾರ, 5 ಲಕ್ಷ ರೂಪಾಯಿಗಿಂತ ಹೆಚ್ಚಿನ ವಾರ್ಷಿಕ ಪ್ರೀಮಿಯಂ ಹೊಂದಿರುವ ವಿಮೆ ಹೊಸ ಹಣಕಾಸು ವರ್ಷದಲ್ಲಿ ತೆರಿಗೆಗೆ ಒಳಪಡುತ್ತದೆ.

ಆದ್ದರಿಂದ, ಮಾರ್ಚ್ 31 ರೊಳಗೆ ಪ್ರೀಮಿಯಂ ಪಾವತಿಯನ್ನು ಪೂರ್ಣಗೊಳಿಸುವ ಮೂಲಕ ನೀವು ತೆರಿಗೆ ಉಳಿಸಬಹುದು. ಆದಾಗ್ಯೂ, ಈ ನಿಯಮವು ಯುನಿಟ್-ಲಿಂಕ್ಡ್ ವಿಮಾ (ಯುಎಲ್‌ಪಿ) ಯೋಜನೆಗಳಿಗೆ ಅನ್ವಯಿಸುವುದಿಲ್ಲ.

ನೀವು ಸಂಬಳ ಪಡೆಯುವ ಉದ್ಯೋಗಿಯಾಗಿದ್ದರೆ, 2022-23ರ ಹಣಕಾಸು ವರ್ಷಕ್ಕೆ ಮಾರ್ಚ್ 31 ರ ಮೊದಲು ನಿಮ್ಮ ಉದ್ಯೋಗದಾತರಿಗೆ ಫಾರ್ಮ್ 12 ಬಿಬಿ ಸಲ್ಲಿಸಬೇಕು.

ಹೂಡಿಕೆಗಳು ಮತ್ತು ವೆಚ್ಚಗಳ ಮೇಲೆ ತೆರಿಗೆ ಪ್ರಯೋಜನಗಳನ್ನು ಪಡೆಯಲು ಇದು ನಿಮಗೆ ಅನುವು ಮಾಡಿಕೊಡುತ್ತದೆ. ಫಾರ್ಮ್ 12 ಬಿಬಿಯಲ್ಲಿ, ನೀವು ಎಚ್ಆರ್‌ಎ, ಎಲ್‌ಟಿಎಸ್, ಹೋಮ್ ಲೋನ್ ಬಡ್ಡಿ ಪಾವತಿ ಮುಂತಾದ ವಿವರಗಳನ್ನು ಸೇರಿಸಬೇಕು.

ನಿಮ್ಮ ಪ್ಯಾನ್ ಮತ್ತು ಆಧಾರ್ ಕಾರ್ಡ್ ಅನ್ನು ಲಿಂಕ್ ಮಾಡಿ

ನಿಮ್ಮ ಪ್ಯಾನ್ ಮತ್ತು ಆಧಾರ್ ಕಾರ್ಡ್ ಅನ್ನು ಲಿಂಕ್ ಮಾಡಲು ಮಾರ್ಚ್ 31 ಕೊನೆಯ ದಿನಾಂಕವಾಗಿದೆ. ದೇಶದ ಶೇ.20ರಷ್ಟು ಪ್ಯಾನ್ ಬಳಕೆದಾರರು ತಮ್ಮ ಪ್ಯಾನ್ ಅನ್ನು ಆಧಾರ್ ನೊಂದಿಗೆ ಇನ್ನೂ ಲಿಂಕ್ ಮಾಡಿಲ್ಲ.

ಸಾಂದರ್ಭಿಕ ಚಿತ್ರ

ನೀವು ಪ್ಯಾನ್-ಆಧಾರ್ ಅನ್ನು ಲಿಂಕ್ ಮಾಡದಿದ್ದರೆ, ನೀವು ಮಾರ್ಚ್ 31 ರವರೆಗೆ 1000 ರೂಪಾಯಿ ಶುಲ್ಕವನ್ನು ಪಾವತಿಸುವ ಮೂಲಕ ಅದನ್ನು ಮಾಡಬಹುದು. ಹಾಗೆ ಮಾಡಲು ವಿಫಲವಾದರೆ ಏಪ್ರಿಲ್ 1 ರಿಂದ ನಿಮ್ಮ ಪ್ಯಾನ್ ಕಾರ್ಡ್ ನಿಷ್ಕ್ರಿಯಗೊಳ್ಳುತ್ತದೆ.

ಮುಂಗಡವಾಗಿ ತೆರಿಗೆ ಪಾವತಿಸಿ

ಟಿಡಿಎಸ್ ಅಥವಾ ಟಿಸಿಎಸ್ ಮತ್ತು ಎಂಎಟಿ ಕಡಿತಗೊಳಿಸಿದ ನಂತರ ವಾರ್ಷಿಕ ತೆರಿಗೆ ಹೊಣೆಗಾರಿಕೆ 10,000 ರೂಪಾಯಿಗಿಂತ ಹೆಚ್ಚಿರುವ ಎಲ್ಲಾ ತೆರಿಗೆದಾರರು ನಾಲ್ಕು ಕಂತುಗಳಲ್ಲಿ ಮುಂಗಡ ತೆರಿಗೆಯನ್ನು ಪಾವತಿಸಬೇಕಾಗುತ್ತದೆ.

ಇದನ್ನೂ  ಓದಿ: Income Tax: ಗೃಹ ಸಾಲದಿಂದ ಆದಾಯ ತೆರಿಗೆ ವಿನಾಯಿತಿ ಪಡೆಯೋದು ಹೇಗೆ? ಇಲ್ಲಿದೆ ವಿವರ

ಮಾರ್ಚ್ 15, 2023 ರೊಳಗೆ ತೆರಿಗೆದಾರರು 2022-23ರ ಹಣಕಾಸು ವರ್ಷಕ್ಕೆ 100 ಪ್ರತಿಶತ ಮುಂಗಡ ತೆರಿಗೆಯನ್ನು ಪಾವತಿಸಬೇಕಾಗಿತ್ತು. ನೀವು ಮಾರ್ಚ್ 15 ರೊಳಗೆ ಮುಂಗಡ ತೆರಿಗೆಯನ್ನು ಪಾವತಿಸದಿದ್ದರೆ, ನೀವು ಅದನ್ನು ಮಾರ್ಚ್ 31 ರೊಳಗೆ ಪಾವತಿಸಬೇಕು.

ಸಾಂದರ್ಭಿಕ ಚಿತ್ರ

ಆದಾಯ ತೆರಿಗೆ ಇಲಾಖೆಯ ಪ್ರಕಾರ, ಮುಂಗಡ ತೆರಿಗೆ ಪಾವತಿಯನ್ನು ಅಲ್ಪಾವಧಿ ಪಾವತಿಸದಿರುವುದು ಅಥವಾ ಮುಂದೂಡುವುದು ಬಡ್ಡಿ ವಿಧಿಸುವಿಕೆಗೆ ಕಾರಣವಾಗುತ್ತದೆ.

ಕಡಿತಕ್ಕೆ ಅರ್ಹವಾದ ಯೋಜನೆಗಳಲ್ಲಿ ಬೇಗನೆ ಹೂಡಿಕೆ ಮಾಡಿ

2022-23ರ ಹಣಕಾಸು ವರ್ಷದಲ್ಲಿ ತೆರಿಗೆ ಉಳಿತಾಯ ಹೂಡಿಕೆ ಮಾಡಲು ಕೊನೆಯ ದಿನಾಂಕ ಮಾರ್ಚ್ 31 ಆಗಿದೆ. ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 80 ಸಿ ಮತ್ತು 80 ಡಿ ಅಡಿಯಲ್ಲಿ ಕಡಿತಕ್ಕೆ ಅರ್ಹವಾದ ಯೋಜನೆಗಳಲ್ಲಿ ಹೂಡಿಕೆ ಮಾಡುವ ಮೂಲಕ ನೀವು 1.5 ಲಕ್ಷ ರೂಪಾಯಿಗಳವರೆಗೆ ಕಡಿತವನ್ನು ಪಡೆಯಬಹುದು.

ಇದನ್ನೂ ಓದಿ: Section 87A: ITR ಫೈಲ್​ ಮಾಡುವಾಗ ಸೆಕ್ಷನ್ 87ರ ಪ್ರಯೋಜನವನ್ನು ಹೀಗೆ ಪಡೆದುಕೊಳ್ಳಿ!

ನವೀಕರಿಸಿದ ಐಟಿಆರ್ ಫೈಲ್ ಮಾಡಿ

2020-21ನೇ ಸಾಲಿನ ಐಟಿಆರ್ ಸಲ್ಲಿಸಲು ಮಾರ್ಚ್ 31, 2023 ಕೊನೆಯ ದಿನವಾಗಿದೆ. ನೀವು ಈ ಕೊನೆಯ ಅವಕಾಶವನ್ನು ಕಳೆದುಕೊಳ್ಳಬಾರದು. 2021-22 ಮತ್ತು 2022-23ರ ಪರಿಷ್ಕೃತ ಐಟಿಆರ್ ಗಳನ್ನು ಮಾರ್ಚ್ 31 ರೊಳಗೆ ಸಲ್ಲಿಸಬಹುದು.