ಎಚ್​ಡಿಎಫ್​ಸಿ ಬ್ಯಾಂಕ್​​ ಉಪಾಧ್ಯಕ್ಷ ಶವವಾಗಿ ಪತ್ತೆ; ಸಹೋದ್ಯೋಗಿಗಳ ಮೇಲೆ ಶಂಕೆ ವ್ಯಕ್ತಪಡಿಸಿದ ಪೊಲೀಸರು

webtech_news18 , Advertorial
-ನ್ಯೂಸ್​ 18 ಕನ್ನಡಮುಂಬೈ,(ಸೆ.10): ಐದು ದಿನಗಳಿಂದ ನಾಪತ್ತೆಯಾಗಿದ್ದ ಎಚ್​ಡಿಎಫ್​ಸಿ ಬ್ಯಾಂಕ್​ ಉಪಾಧ್ಯಕ್ಷ ಸಿದ್ದಾರ್ಥ್​ ಸಾಂಘ್ವಿಯ ಮೃತದೇಹ ಸೋಮವಾರ ಬೆಳಿಗ್ಗೆ ಮುಂಬೈನ ಕಲ್ಯಾಣಿಯಲ್ಲಿ ಪತ್ತೆಯಾಗಿದೆ.

ಸಾಂಘ್ವಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮತ್ತಷ್ಟು ತನಿಖೆ ನಡೆಸಲು ಭಾನುವಾರ ಶಂಕಿತ ಆರೋಪಿ ಸರ್ಫರಾಜ್ ಶೈಖ್​ನನ್ನು ನವಮುಂಬೈ ಪೊಲೀಸರು ಬಂಧಿಸಿ, ಮುಂಬೈ ಪೊಲೀಸರ ವಶಕ್ಕೆ ಒಪ್ಪಿಸಿದ್ದರು. ತನಿಖೆ ವೇಳೆ ಆತನೇ ಕೊಲೆ ಮಾಡಿರುವುದಾಗಿ ಒಪ್ಪಿಕೊಂಡಿದ್ದು, ಆತನ ಹೇಳಿಕೆಯ ಆಧಾರದ ಮೇಲೆ ಇನ್ನೂ ಮೂವರು ಆರೋಪಿಗಳನ್ನು ಬಂಧಿಸಲಾಗಿದೆ.ಸಿದ್ದಾರ್ಥ್​ ಸಾಂಘ್ವಿಗೆ ಸಿಕ್ಕ ಬಡ್ತಿ ಮತ್ತು ಭತ್ಯೆಯಿಂದ ಆತನ ಸಹೋದ್ಯೋಗಿಗಳು ಅಸೂಯೆಗೊಂಡಿದ್ದರು. ಇದರಿಂದಾಗಿ ಆತನನ್ನು ಕೊಲೆ ಮಾಡಲು ಸಹೋದ್ಯೋಗಿಗಳೇ ಈ ಸಂಚು ನಡೆಸಿದ್ದಾರೆ  ಎಂದು ಪೊಲೀಸರು ಶಂಕೆ ವ್ಯಕ್ತಪಡಿಸಿದ್ದಾರೆ. ವೃತ್ತಿಪರ ಅಸೂಯೆಯೇ ಸಾಂಘ್ವಿಯ ಕೊಲೆಗೆ ಕಾರಣವಾಗಿದೆ ಎಂದು ತಿಳಿದುಬಂದಿದೆ.ಮೂಲಗಳ ಪ್ರಕಾರ, 20 ವರ್ಷದ ಶಂಕಿತ ಆರೋಪಿ ಕ್ಯಾಬ್​ ಚಾಲಕನಾಗಿ ಕಾರ್ಯನಿರ್ವಹಿಸುತ್ತಿದ್ದ. ಸಿದ್ದಾರ್ಥ್​ ಸಿಂಘ್ವಿಯನ್ನು ಕೊಲೆ ಮಾಡು ಎಂದು ಯಾರೋ ಒಬ್ಬರು ಹೇಳಿದ್ದರಿಂದ ಈ ಕೊಲೆಯನ್ನು ಮಾಡಿರುವುದಾಗಿ ಆ ಕ್ಯಾಬ್​ ಚಾಲಕ ಒಪ್ಪಿಕೊಂಡಿದ್ದಾನೆ. ಸಾಂಘ್ವಿ ಕೆಲಸ ಮುಗಿಸಿ ಕಮಲ ಮಿಲ್ಸ್​ ಬಳಿ ಪಾರ್ಕ್​ ಮಾಡಿದ್ದ ತನ್ನ ಕಾರಿನ ಬಳಿ ಬಂದಾಗ ಶಂಕಿತ ಆರೋಪಿ ಆತನ ಮೇಲೆ ಆಕ್ರಮಣ ಮಾಡಿ ಕೊಲೆ ಮಾಡಿದ್ದಾನೆ. ಮೊನ್ನೆಯಷ್ಟೇ ನವಮುಂಬೈನಲ್ಲಿ ಸಾಂಘ್ವಿಯ ಕಾರು ಪತ್ತೆಯಾಗಿದ್ದು, ಕಾರಿನ ಹಿಂಬದಿ ಸೀಟಿನಲ್ಲಿ ರಕ್ತದ ಕಲೆಗಳು ಮತ್ತು ಚಾಕು ಕಂಡುಬಂದಿತ್ತು.ದಕ್ಷಿಣ ಮುಂಬೈನ ಮಲಬಾರ್​ ಹಿಲ್​ ಏರಿಯಾದಲ್ಲಿ ವಾಸವಿದ್ದ ಸಿದ್ದಾರ್ಥ್​​, ಬುಧವಾರ ಬೆಳಿಗ್ಗೆ 8.30 ರ ಸಮಯದಲ್ಲಿ ಕೆಲಸಕ್ಕೆ ತೆರಳಿದ್ದರು. ಆದರೆ ಮನೆಗೆ ವಾಪಸ್​ ಬರಲಿಲ್ಲ ಎಂದು ಆತನ ಹೆಂಡತಿ ಮುಂಬೈನ ಎನ್​ ಎಂ ಜೋಶಿ ಮಾರ್ಗ್​ ಪೊಲೀಸ್​ ಠಾಣೆಗೆ ದೂರು ನೀಡಿದ್ದರು. ಪ್ರಕರಣವನ್ನು ಕೈಗೆತ್ತಿಕೊಂಡ ಮುಂಬೈ ಪೊಲೀಸರು ಹಂತಕರನ್ನು ಸೆರೆಹಿಡಿಯಲು ಬಲೆ ಬೀಸಿದ್ದರು. ಕಾರಿನಲ್ಲಿ ಪತ್ತೆಯಾಗಿದ್ದ  ರಕ್ತದ ಕಲೆ ಸಾಂಘ್ವಿ ಅವರದ್ದಾ ಎಂದು ಖಚಿತಪಡಿಸಿಕೊಳ್ಳಲು, ಆ ರಕ್ತದ ಮಾದರಿಯನ್ನು ಫೋರೆನ್ಸ್​ ಪರೀಕ್ಷೆಗೆ ಕಳುಹಿಸಲಾಗಿತ್ತು.ಸಾಂಘ್ವಿ ಕೆಲಸ ಮಾಡುತ್ತಿದ್ದ ಸ್ಥಳ ಕಮಲ ಮಿಲ್ಸ್​​ ಕಾಂಪೌಂಡ್​ ಬಳಿಯಿದ್ದ ಸಿಸಿಟಿವಿ ದೃಶ್ಯಾವಳಿಯನ್ನು ತನಿಖಾಧಿಕಾರಿಗಳು ಪರಿಶೀಲಿಸಿದ್ದರು. ಸಾಂಘ್ವಿ ಸಂಜೆ 7.30 ರ ಸಮಯದಲ್ಲಿ ಬ್ಯಾಂಕ್​ ಕೆಲಸ ಮುಗಿಸಿ ಪಾರ್ಕಿಂಗ್​ ಏರಿಯಾಗೆ ಬಂದಾಗ ಹಂತಕರು ಆತನ ಮೇಲೆ ಆಕ್ರಮಣ ಮಾಡಿದ್ದರು. ಸಾಂಘ್ವಿಯ ಕೊನೆಯ ಮೊಬೈಲ್​ ಟವರ್​ ಸ್ಥಳವನ್ನು ಟ್ರೇಸ್​ ಮಾಡಿದಾಗ, ಸಂಜೆ 7 ಗಂಟೆಗೆ ಕಮಲ ಮಿಲ್ಸ್​ ಬಳಿ ತೋರಿಸಿತ್ತು.

Trending Now